揸車唔熟路就正常不過，但唔熟路又唔熟道路標示就令人嘖嘖稱奇。讀者Ben噚日沿何文田孝民街開車，路面係雙線單程行車，點知一駕私家車突然迎面轉入，仲喺兩架學牌車之間揳車罅駛過，場面驚險。
事件發生喺何文田孝民街同忠孝街路口，孝民街屬單程路，車輛只可以轉出忠孝街，路口亦豎立兩個不准駛入路標。不過，前日傍晚5點幾，一架沿忠孝街行駛嘅私家車，駛到上址時突然停低，打起右燈，過咗4秒即違例右轉駛入孝民街，仲喺兩架學神之間駛過，差啲迎頭相撞。
當時孝民街兩條行車線分別有一架學牌私家車，同一架學牌客貨車，只見兩架車都即時停低，避免被違例轉入嘅私家車撞到。片段上載網上後，有網民不滿私家車司機目無法紀，更直斥司機隨時「害死人」。