前特首梁振英除咗挑釁性十足嘅言論令人難以忘記之外，佢出席活動嘅貼題穿着都令人留下好深印象，好似當年佢着童軍服出席年度童軍大會操（左圖），今年又着華服出席華服節咁，反觀特首林鄭月娥就少啲咁嘅驚喜新意，去到邊都多數以旗袍示人，噚日佢再度以童軍總領袖身份出席年度童軍大會操，亦係着便服咋。
雖然娥特唔多喜好cosplay，但佢早前喺港珠澳大橋上，就以一身粉紅色旗袍而變成「萬綠叢中一點紅」，搶晒鏡，噚日佢雖然以灰色長外套配黑西褲出席會操，但加咗條藍絲巾點綴，所以同着上綠色童軍服嘅高等法院上訴法庭法官兼香港童軍總會會長潘兆初，仲有一大班童軍合照時，同樣喺萬綠叢中別樹一格。而且娥特會操後要出發去上海訪問，着便服就連換衫時間可以慳番。