「行人路都唔安全㗎！」無論揸車定行路，幾時都要瞻前顧後，留意四周環境。有網民喺fb群組「香港交通突發報料區」上載咗一條短片，見到一架開行中嘅貨車，車尾右上方有一塊門板懷疑冇閂好，架車一路行道門板一路吊吊揈，偶然拍打車身仲發出啪啪聲，咁啱行人路有兩個途人，差啲俾道門拍中個頭，好彩佢哋避得切冇事，但相信佢哋都嚇一跳。
網民Sshing Cheung早兩日上載嘅車cam片，顯示拍攝日期係上個月14號，下晝1點幾，喺中環威靈頓街向上環方向，近住皇后大道中，嗰度係雙線單程，慢線有啲死車，一架貨車沿快線慢慢落斜，而喺佢右邊就有一條只可以容納一個人行嘅行人路。貨車車斗右邊上方有一道門板一路行一路吊吊揈，行咗7至8秒左右，突然間啪啪聲，嚇到行人路上面兩個前後腳嘅途人即刻停低，嗰道門板差啲打中佢哋。貨車都即刻停低。
網民睇完條片紛紛留言，有人鬧個司機離譜，咁危險，亦都有人留言話：「高少少嘅話咪頭都冇埋！」