隔牆有耳：
阿人囡囡助打選戰　
由兩歲開始 - 李八方

政府提出萬億東大嶼人工島計劃，搞到唔少為人父母嘅市民，甚至大住肚嘅都要走出嚟，為下一代抗議。以「為下一代，背水一戰」為口號，出戰11.25立法會九龍西補選嘅民主派代表李卓人，前日喺fb貼咗佢26年前「揹囡一戰」嘅相，當時佢揹住得兩歲嘅囡囡適之上街爭取男性侍產假，雖然政策喺3年前先至落實，但都叫有成果，估唔到係已長大成人嘅囡囡，今次都喺阿人背後同佢一齊出戰。

幫手繙譯文宣

阿人前日喺fb出po，憶述喺港大工程系畢業嘅自己，點解唔做專業人士走去搞工運、爭取基層權益，幾十年過去，最感慨梗係爭取乜嘢都好漫長，男性侍產假叫足23年，爭取最低工資條路都行咗12年。阿人就話係「滴水終可穿石」，仲話下個目標劍指44小時標準工時喎。

至於阿人當年揹住上街抗爭嘅囡囡，𠵱家長大成人喺英國傳媒機構做記者，咁佢會唔會出面幫爸爸拉票呢？阿人同八方講，囡囡十分支持佢繼續為香港人服務，因為囡囡都覺得香港前景黯淡，要有人撐住，雖然唔會返嚟幫手拉票，但身體力行用支筆撐爸爸，幫手繙譯文宣，「我個參選文宣都係佢譯」，仲知道爸爸忙住競選工作，幫爸爸bookmark一堆Netflix電影，等阿人選完之後一次過追返夠本。