近年香港有好多唔同嘅主題跑步活動，大人細路都啱玩，推動運動熱潮，今個周末一連兩日（3及4日）就有個以迪士尼同彼思為主題嘅10K跑，喺迪士尼樂園度假區舉行，跑手可以同近期紅爆中港嘅小豬Piglet、超人特攻隊等過百個迪士尼朋友，喺秋風之下出番身汗眾樂樂，難怪兩日活動吸引咗13,000人參加，大會都話今年人數破晒紀錄。唔好以為得跑手參加完活動會身心健康咗，原來好多人都受惠，皆因迪士尼向東華三院何玉清教育心理服務中心捐出部份收益，為特殊學習需要兒童同青少年提供兩年期計劃，旨在幫佢哋增進社交技巧，仲同「港協暨奧委會奧夢成真有限公司」舉辦培訓計劃，分別為有特殊學習需要同嚟自少數族裔嘅學生提供跑步訓練，齊齊參加「怪獸大學5公里跑」，仲有星級長跑運動員陳家豪教班，希望小朋友跑出自信。
平時眼見好多跑步活動因為提供食水補給，造成唔少浪費，今次迪士尼亦行多步，除咗鼓勵跑手自攜水樽，仲首次喺部份賽事引入可回收膠杯，同大幅增加可重用水杯，佔整體用量85%㗎，為保護地球出力。