西甲雙雄皇家馬德里同巴塞隆拿喺上星期六嘅聯賽齊齊贏波，不過兩隊都贏得驚險，分別尾段入波主場以2:0擊敗華拉度列同作客3:2擊敗華歷簡奴，尤其皇馬喺看守教練蘇拿利帶隊嘅首場西甲下，要靠「新尼馬」雲尼斯奧斯祖利亞後備上陣做救兵，先險勝有「大哨」朗拿度做班主嘅華拉度列。球員時代唔夠隊友大哨威嘅蘇拿利，今仗都叫攞晒彩啦。
後備上陣改變戰局
皇馬早前炒教練盧比迪古，改由蘇拿利暫時領軍，繼喺西盃大炒低組別球隊美利拉四球之後繼續有好表現。球隊上星期六迎戰有皇馬名宿「大哨」朗拿度擔任主席嘅華拉度列，今場皇馬夫添應戰，不過上半場狂攻之下未有收穫，先後有賓施馬射門柱邊出界，同加里夫巴利嘅兩次埋門被對方門將佐迪馬斯比撲出。
下半場兩隊鬥攻，賓施馬起腳被對方守衞護空門擋出，卡斯米路補射又再畀門將撲出；而華拉度列之後亦有兩次中楣。大難不死嘅皇馬到完場前靠73分鐘後備入替嘅雲尼斯奧斯殺入禁區起腳，省中對方後衞入網。原本賽會當烏龍球，之後更正為雲尼斯奧斯入波。
呢位巴西前鋒完場前再交出妙傳，令賓施馬喺禁區內被對手攔跌獲判12碼，沙治奧拉莫斯主射中鵠，為皇馬奠定2:0勝局，蘇拿利上任取得兩連勝，兼且終止球隊聯賽五戰不勝嘅頹勢。值得一提嘅係，雲尼斯奧斯今季加盟皇馬之後，一直都喺B隊跟隨蘇拿利，今場成為贏波功臣，相信佢未來喺皇馬有大把機會。
阿蘇絕殺唔「簡」單
同日另一場巴塞隆拿就作客華歷簡奴，巴塞隊長美斯因為右手骨裂繼續缺陣，不過仍然憑近況大勇嘅蘇亞雷斯喺開賽後11分鐘接應佐迪艾巴嘅傳中射入先開紀錄。不過華歷簡奴喺35分鐘就由普素妙射扳平，換邊後12分鐘仲靠後備入替嘅艾華路加西亞射入反先一球。
巴塞之後換入奧士文尼迪比利等進攻好手加強攻勢，終於喺尾段有收穫，迪比利87分鐘禁區內接應碧基頭槌回傳抽射遠柱入網。臨完場前，沙治羅拔圖右路斬入禁區，伏兵遠柱嘅蘇亞雷斯近門第一時間撞射入網，結果巴塞幾經辛苦之下反勝華歷簡奴3:2，繼續排西甲榜首。