求驗客手記：新帥上任賓施馬又有「士哥」

炒咗盧比迪古嘅皇家馬德里，周三西盃第四圈首回合喺暫代主帥蘇拿利督師下，即刻識得贏番波。雖然對手只係西乙B球隊美利拉，但可以大勝4:0，而先拔頭籌嘅賓施馬，近五次皇馬有新帥上任，呢位法國球星其中四次喺新教練麾下首場正式比賽「士哥」，可謂另類嘅「地標」專家。

皇馬炒咗盧比迪古唔夠兩日就要造訪美拉利，雖然只有賓施馬同沙治奧拉莫斯兩位老大哥夾住一班後生仔，但仍然大捷。場波28分鐘已經由賓施馬先開紀錄，加埋馬高阿辛斯奧、奧迪奧蘇拿同後備入替嘅基士圖干沙利斯，下半場亦各入一球，結果首回合就湊夠四隻光蛋送畀美利拉。同日另一場波，巴塞11個正選換晒，依然靠基文迪朗格勒頭槌建功，以1:0絕殺最後得10人應戰嘅西乙B球隊利安尼沙。