工聯會前立法會議員鄧家彪今年初喺立法會新東補選落敗，盛傳佢喺明年區議會選舉，將會由離島區轉戰沙田水泉澳，為2020年立會選舉喺新東捲土重來熱身。轉區一事有迹可尋，八方發現，鄧家彪最近去信立法會教育事務委員會，要求當局解釋水泉澳邨入伙三年，點解仲未有小學，似乎係為下年區選鋪緊路。
阿彪喺信入面話，北區皇后山公屋項目尚未入伙，政府就向立法會申請建校，質疑教育局厚此薄彼。八方就問過阿彪咁緊張水泉澳有冇小學，係唔係為明年區選準備轉戰水泉澳？佢就話，無論沙田同東涌嘅服務，都希望兼顧，又話自己𠵱家係工聯會新界東辦事處總幹事，所以先會多啲處理新東嘅問題，選舉問題就遲下再算。