德混血女模貝安琪將於今個月18日，與加拿大籍男友Simon van Damme拉埋天窗，在香港舉行婚禮兼註冊，日前一對準新人到山頂影婚紗相，貝安琪點名由攝影師Ali Ghorbani操刀。
足球𠱁囝囝
去年2月貝安琪誕下囝囝Sebastian（小龍），婚紗相一對準新人與小龍一起拍攝，原本在車內睡午覺的小龍叉足電後現身，近來特別黐身的他睡醒後找完爸爸找媽媽，弄得大家哭笑不得，到看到他喜歡的足球，才平靜下來，並與父母邊玩邊完成一家三口合照，貝安琪對此說：「加埋小龍，特別有意思，三個一齊特別開心，小朋友係好活潑。」
貝安琪曾表示以500巴仙的愛，愛Simon，Simon也對貝安琪送上無限的愛，貝安琪說：「Simon係成日搞笑嘅人，佢令到我好開心，佢對每樣嘢都好細心，尤其係我哋個仔，佢好專心照顧佢同我，佢會100分去盡佢所能令我哋開心。佢所有嘢都諗得好正面，呢樣嘢令到我個人都開心咗好多。」
Simon相當幽默，拍攝時逗得貝安琪好開心，貝安琪揀香港拍攝婚照，也有特別原因：「其實我哋搵咗兩位攝影師，兩輯相都好唔同，我哋都好鍾意，因為想有兩個唔同風格。始終我哋喺香港識、住喺香港、喺香港結婚，所以喺香港影係好適合。揀呢個地方係攝影師提出，我哋拍拖就鍾意去沙灘多啲，不過如果去沙灘影就太辛苦，嚟山頂影個個都舒服啲。」
再搞中式宴
還有兩星期就真正成為人妻，貝安琪說：「好開心，就嚟到、就嚟完成，其實一路籌備都唔太辛苦，但最後係因為家人同朋友嘅意見就辛苦少少，不過我𠵱家都唔係好理，我哋兩個先最重要，媽咪話我係太西方嘅諗法，我始終喺德國長大，但都好尊重中國傳統文化，一定會擺酒嘅，18日會係好細嘅派對，先註冊，我哋決定明年再搞一次中式同一次自己嘅婚宴，中式嘅媽咪全權搞晒，咁樣個個都開心。」
採訪：羅慧敏
攝影：Ali Ghorbani
化妝：WingKee
髮型：Timothy Lee
更多精采時尚內容，盡在 http://add.appledaily.com。