星期日晚9點幾，周先生行去中環干諾道中怡和大廈對開巴士站等巴士，見到有架去小西灣藍灣半島嘅城巴788號線停咗喺巴士站，打開咗門傳出鬧交聲。
佢聽到車長同一個男乘客嘈交，個乘客鬧車長「食屎」，戴住口罩嘅車長就不斷爆粗回敬，有乘客上去勸佢哋，但車長好好火氣，堅持唔開車。有乘客埋怨畀咗錢咁點，車長只係叫佢哋等第二班車。周先生話聽到有乘客話驚車長同乘客嘈完交，有可能影響情緒，坐佢車都怕怕，寧願落車。
同車長嘈交嘅男乘客同行女親友鬧車長：「做司機做到你咁！」車長即刻還口：「阿嬸，乜X嘢呀！」男乘客話唔使同呢啲廢人講嘢，車長繼續爆粗：「X家鏟……等差人嚟啦……投訴啦！」周先生覺得車長雖然可能俾乘客侮辱，但都唔應該講粗口，「好似爛仔咁，過份咗，始終佢都係開緊工。」
788號線行走上環港澳碼頭至小西灣藍灣半島，事發時係開去小西灣方向。城巴發言人稱公司關注事件，會作出調查。