肥仔K跟初創公司創辦人到美國爭取大集團資助/技術合作,十月份先後去咗三藩市與西雅圖,肥仔K話初步印象係幾正面,但競爭對手有歐洲與美國初創公司,佢地係唯一嘅香港公司,尚未肯定可否中選。
因利乘便,肥仔K返到曾經居住嘅城市,印象係三藩市樓價屋租日益昂貴,等閒人應付不了,西雅圖亦然,總之呢兩個城市在科技上各領風騷,亞馬遜微軟為西雅圖帶來大量工作職位,足以代替波音公司有餘,三藩市與矽谷融合為一體,科技公司林立,更不在言,然而在繁榮背後,市面上有大量無殼蝸牛露宿街頭,令人心酸,貧富十分懸殊。
講開三藩市,一位三藩市居民讀者來函回應「港式成功靠父幹」之言。佢話三藩市不比香港,父母甚少直接代子女買樓交首期,而係要詳細比較每人嘅稅務情況(tax position)之後,先至決定用甚麼方法買樓嘅;因為美國稅種繁多也,唔考慮清楚遺產稅、聯邦稅、州稅、地方稅及個人入息稅等等,一定蝕底,例如呢位讀者同兒子考慮清楚之後,就係兒子將個人儲蓄借給母親,由母親買樓,再租給兒子!
讀者又提醒香港朋友,到三藩市買樓要睇清楚地區,三藩市罪案多,無家可歸露宿街頭者不在少數,買樓人士要注意區內治安,而且買賣接手過程有陷阱,不比香港,更要小心,最近鬧出「醜聞」嘅係市內豪宅大廈Millennium Tower San Francisco (301 Mission Street) 2009年入伙,平均兩房單位售價180萬美元,點知入伙20年後發現有沉降問題,大廈有傾斜,即時引發連環訴訟,於是搞到依家呢間豪宅買賣陷入冰封狀態,無人問津,已入伙業主則面對一連串管理費維修費地稅及律師費分攤問題,搞到焦頭爛額,真杰。呢位讀者講起Millennium Tower,好似有啲印象噃,趁收到投資A電話,向佢問吓,點知即刻中獎。投資A在家中慘叫:「我就係Millennium Tower業主呀,在美國,人老了就想上樓,兩年幾前我買咗個單位預備搬返市區中心住,將間獨立屋租畀人,點知還未搬過去就發生大樓沉降傾斜醜聞,我唔敢搬入去,損失慘重呀!」移民美國嘅老友,不少住在市郊大屋,但人老了,兒女結婚搬走,兩老住間四千呎大屋,掃地都冇力,剪草更辛苦,於是爭相上樓,搬去市區condo,投資A有錢就買咗Millennium Tower,真慘情,又話三藩市對新樓建築監管好嚴格,點知亦不外如是!