立法會辯論用特權法查沙中綫問題，民主、建制兩派嘅立場相當清楚㗎喇，重點係建制派點樣保皇箒。民建聯元秋蔣麗芸身先士卒，撲出嚟表態反對，但講講吓，連黑哨立法會主席梁君彥都頂佢唔順，話佢離題百丈。
元秋一發功既鬧政府，又鬧港鐵，話佢哋冇及早通報畀區議會知，令區議員相當憤怒。元秋話自己係企喺市民角度去睇呢件事，話身為議員應有之義係「第一時間幫佢哋尋找出佢哋擔心嘅事有冇答案」，然後起勢咁數自己做咗啲乜。數咗差唔多10分鐘，梁君彥終於出聲提醒元秋，呢個辯論其實係講緊用唔用特權法，唔係講石屎剝落問題，跟住元秋先至肯收口。其實，鬧就人人都識得鬧，喺議會，投票立場先係最誠實。