禮拜三英聯盃16強賽事，倫敦三雄車路士、熱刺同阿仙奴齊齊晉級。其中焦點落咗喺前車仔名將林柏特，佢帶領英冠打比郡重返史丹褔橋，受到車迷熱烈歡迎，估唔到林伯亦相當客氣，事關打比郡送咗兩個烏龍波畀車仔，結果以2:3敗走。
賽後林伯就話對賽果失望，但球隊表現令佢自豪，同時感激車仔球迷嘅愛戴！
打比郡擺兩老烏贈興
林伯球員生涯效力車仔長達13年，上陣649場，仲射入咗211球，成為藍戰士入球紀錄保持者；首次以領隊身份重返史丹福橋，當然受到英雄式歡迎。開賽前，車迷展示林柏特入波慶祝動作嘅巨型海報，同寫上「林柏特，永遠的藍戰士，永遠的傳奇」嘅標語，向佢致敬。
不過打比郡始終係英冠料，雖然兩名車仔借將莫特同湯姆利都獲准倒戈，但擔任中堅嘅湯姆利，踢咗五分鐘就離奇解圍撻Q，個波撞中佢隻腳碌入咗自己龍門。打比四分鐘後就由積克馬利諾追平1:1，點知踢到21分鐘，輪到隊長基奧治擺烏龍再次落後。不過，打比郡似乎亦有林柏特永不放棄嘅精神，相隔六分鐘就由馬田韋漢入波追成2:2平手，但實力較高嘅車仔，憑法比加斯喺上半場41分鐘入波，半場領先3:2嘅情況下，全場亦以呢個比數結束。
賽後林伯先同車仔教練團逐一握手，然後喺史丹福橋繞場一周，向喺比賽期間曾經高唱「超級林柏特之歌」嘅車迷致謝。賽後林伯話：「我對賽果感到失望，球隊創造咗唔少入球機會，至少應該打和，不過我對球隊嘅表現感到自豪，車仔職員仲讚我哋踢得好。」林伯又主動多謝車路士同球迷：「喺我離開車路士時雖然唔算順利，但𠵱家我喺史丹福橋只有美好嘅回憶，球迷嘅愛我完全感受到，好幸運可以擁有一個咁正嘅晚上！」
阿仙奴八強撼熱刺
至於兩支北倫敦雙雄，熱刺喺孫興民起孖下作客3:1擊敗殘陣嘅韋斯咸；阿仙奴就喺新星古安杜斯領紅牌下，主場2:1險勝英冠黑池。賽後英聯盃八強亦進行咗抽籤，咁啱阿仙奴將會喺主場迎戰熱刺，上演北倫敦打吡爭入四強，車仔就會對般尼茅夫。