金庸前日逝世，社會不同界別人士紛紛致哀，當中自然不乏政界及政府官員，但又點少得經常在網上「發聲」嘅前特首梁振英。不過八方見佢喺社交網寫嘅嘢，似乎同查大俠冇乜直接關係，似讚自己如何英明神武居多。
踩沙田交通唔方便
689篇文話2017年3月開放嘅金庸館，就係由他本人主持開幕儀式，仲話自己係偶然從特區政府同事口中得知有揭幕典禮安排，佢知道後話「金庸館開幕應該由特區政府最高層主持，以示重視」，仲好自豪咁講「這是我五年行政長官任期內和同事『爭』做主禮的唯一一次」。
借金庸館自誇都未算，仲藉機踩多腳，話金庸館係沙田香港文化博物館常設展覽館，不過佢覺得規模可以更大，又話沙田交通對外地遊客唔方便，認為香港應該有一個獨立、大規模同地點方便嘅金庸館，話香港應該有一個更好金庸館，仲話「香港不做，恐怕其他城市會搶去做」。