金庸仙逝，遺下唔少膾炙人口嘅作品，立法會內多名議員都係「金粉」，噚日一提到金庸小說都滔滔不絕。八方問過幾位議員，覺得自己係金庸筆下邊個角色？
《笑傲江湖》嘅令狐沖似乎係最多人鍾意嘅角色，專業議政梁繼昌話自己同令狐沖最相似，因為自己不拘小節同埋講義氣，亦都廣交朋友，佢希望可以學到令狐沖做人處事方式，但最鍾意嘅作品則係《天龍八部》，因為內容引人入勝、曲折離奇，想當年仲係5毫子租一日嚟睇㖭。
另一個想成為令狐沖係民主黨胡志偉，佢話令狐沖「天跌落嚟當被冚」，唔理世俗眼光，希望自己可以好似令狐沖咁豁達，但又有責任心㗎噃。
公民黨楊岳橋則最想成為《倚天屠龍記》中嘅楊逍，或者《射鵰英雄傳》同《神鵰俠侶》中嘅黃藥師，又有型又瀟灑，但無奈自覺最似都係周伯通，最鍾意玩吖嘛。外國讀書嘅佢中學開始睇金庸作品，直至𠵱家都會每年翻睇，佢話好在有金庸小說，令佢keep住接觸中文，對中文唔會陌生。
已婚阿鼎想做韋小寶
已婚嘅民建聯周浩鼎就話最鍾意《鹿鼎記》嘅韋小寶，覺得韋「使命必達」，而且為人靈活，遊走喺天地會同康熙之間都游刃有餘，對朋友又有義氣喎。之但係講到韋小寶政治立場不定，有兩個「老細」喎……阿鼎就話唔會學佢呢樣，會忠於自己原則，而且老婆一個已經夠晒數。
李八方