如果事業低潮都有分級數嘅話，前利物浦門將卡利奧斯肯定屬於「世界級」，呢位德國門將今季被紅軍外借到比錫達斯，不過竟然連土超都踢唔掂，有傳比錫達斯都想「退貨」，將佢送番畀紅軍。卡利奧斯本人喺ig甫咗張咖啡相，爆粗指摘傳媒搞風搞雨，無事生非想整死佢。
上季原本一直表現不過不失嘅卡利奧斯，喺歐聯決賽兩次嚴重犯錯，令利物浦以1:3不敵皇家馬德里，唔單止痛失冠軍，就連卡利奧斯嘅信心亦都大受打擊，喺季前熱身賽又再「派膠」，搞到高路普都唔敢再用佢，決定以天價收購羅馬嘅巴西國腳艾利臣比加，並且將卡利奧斯外借去比錫達斯，仲要一借借夠兩年兼加埋買斷條款，兼且「貼埋大床」幫比錫達斯畀埋卡利奧斯一半人工，都可以話紅軍為求送走呢位25歲門將都做到盡。
土超都踢唔掂
原本諗住卡利奧斯離開英格蘭呢個是非地之後可以慢慢重新振作，點知佢去到土超之後似乎都係踢唔起，地標戰就即刻再有失誤，之後喺歐霸盃對馬模又再俾對手笠死，搞到球隊輸咗0:2，佢最近四次為比錫達斯上陣就失咗12球，加上佢同比錫達斯球迷嘅關係最近又漸趨緊張，搞到球會都好頭痛。
據土耳其傳媒報道，比錫達斯對於狀態持續低迷嘅卡利奧斯失去耐性，希望喺明年一月將佢提前送番去利物浦，然後借用今季喺紅軍一直都冇上陣機會嘅前鋒奧歷治。
紅軍恕不退換
比錫達斯打算「退貨」嘅消息傳出之後，卡利奧斯就冇公開回應，不過佢日前喺社交網站就上載咗一張佢自己飲緊咖啡嘅相，仲貼文爆粗話「咖啡第一、傳媒嘅Bxxxxxxt第二」，暗寸傳媒報道不實。英國《每日快報》報道就指出，利物浦同比錫達斯之間喺卡利奧斯嘅租借合約入面，並冇設定任何提前終止合約條款，意味比錫達斯即使唔想要卡利奧斯都好，至少都要「硬食」兩年。如果報道屬實嘅話，紅軍呢招就夠晒絕，真係「閘住反彈冇回頭」咯！