噚日朝早10點幾，有部吊臂車經過金鐘添美道政府總部對開行人天橋橋底，突然傳出「嘭」一聲，原來係吊臂撞中橋底！唔單只撞爛石屎，仲扯爛天橋底膠板，跌落嚟嘅碎片擊中咗兩架私家車。
市民阿堅經過現場目擊事件，「成條吊臂刮住天橋底行，去到盡頭、頂住咗天橋頂行唔到」。當時吊臂車係沿添美道北行，意外後警員到場處理，原來61歲姓李司機疑似冇收好吊臂，不過好彩冇人受傷，但行人天橋一度封閉，交通亦受阻。有網民覺得吊臂車司機太粗心大意，點解連個吊臂過唔過到天橋都預計唔到喎。
其實同類事件都發生過好多次，好似今年1月20日一部冇收好吊臂嘅吊臂車，喺柴灣道慈幼中學對開撼向行人天橋，撞到條橋變晒形。雖然今次冇咁嚴重，但睇嚟司機都要賠唔少錢畀政府喇。