球場上嘅入波慶祝方式千奇百怪，不過日前一場智利聯賽入面，委內瑞拉球員艾度亞貝路嘅慶祝方式就夠晒勁，即場同女友求婚，至威係佢啦！星期日一場安圖法加斯達對維拿迪馬愛華頓嘅智利甲組聯賽中，效力安圖法加斯達嘅23歲嘅委內瑞拉中場艾度亞貝路開賽兩分鐘就射入一球，之後佢即刻跑到觀眾席同女友（下圖）求婚，仲即場幫女友戴埋求婚戒指，當然唔少得深情一吻啦，在場嘅球迷都鼓掌祝賀呢對情侶，不過一直企喺球場等緊開波嘅球證先生就唔係咁高興喇，求婚都冇面畀，黃牌警告。
唔知貝路同佢班隊友係咪開心得滯冇晒心機踢波呢，安圖法加斯達喺呢場賽事最後就以2:3輸咗畀要護級嘅維拿迪馬愛華頓，不過唔緊要啦，求婚成功咪得囉，𠵱家仲全世界都知道㖭，夠晒威威豬！話時話，唔知下一集《FIFA20》會唔會考慮吓加入艾度亞貝路呢個咁特別嘅入波慶祝方式呢？