八方之前報道過，公民黨麗港城地區發展主任李煒林（William）喺上月中山竹襲港後，發起麗港公園救樹行動，堅持為冧咗但根部仲連住泥土嘅大樹淋水保濕成個月，保住佢哋條命仔。事隔一個月，終於捱到康文署嚟視察，加上街坊動之以情，說之以理，感動署方承諾兩周內救樹，一班街坊終於苦盡甘來。
成功爭取康文署施援手
經過一個月嘅吊命工作，William噚日聯同師傅、飛機師譚文豪，仲有樹木專家趙紹惠同一班救樹街坊，一齊同康文署九龍樹隊人員去麗港公園視察，William話當時有啲似講數咁，因為佢哋確實做足前期工夫，加上街坊現場亦講述同大樹嘅感情，終於令到「對方（署方）都有啲反應」。William形容署方由最初唔係咁情願，到最後應承喺7棵重點樹中盡力救返5棵，包括1棵30年洋紫荊及街坊特別鍾情嘅桃樹，另外有棵大榕樹就會請樹藝師修復成盆景樹。
今次可算William服務麗港城兩年幾以嚟嘅「成功爭取」，佢話街坊嘅團結同堅持先係最重要，為咗答謝街坊，之後佢會搞個海濱公園野餐活動同街坊慶功，繼續親親自然！