身在日本訪問嘅林鄭嚟緊11月變空中飛人，不停外訪，其中重頭戲相信係帶工商界及愛國社團中人訪京。今年係國家改革開放40周年，中央當然好重視，有傳媒報道北京已經邀請林鄭做團長，帶領對中國改革開放有貢獻嘅工商界猛人訪京，中聯辦主任王志民就會以顧問身份隨團，陪住林鄭行埋到北京。雖然未公佈邊位國家領導人接見，但有消息話好可能係國家主席習近平。
689唐唐隨團
據知呢個逾百人訪京團約喺10日至12日成行，去北京前會先到深圳、即係國家改革開放第一個試點考察，有消息指全國政協常委唐英年、前政協常委陳永棋、溢達集團楊敏德等亦獲邀，現任港區人大常委譚耀宗同香港專業聯盟主席劉炳章亦榜上有名。據知前特首梁振英會以全國政協副主席身份隨團。
對上一次香港嘅大型訪京團已經數到2014年9月，即係佔中運動爆發前夕，當時帶隊嘅係全國政協副主席、前特首董建華，主要係大孖沙同專業界代表隨團，幾大地產商頭目如長實李嘉誠、恒地李兆基、新世界鄭家純等畀面參加。當時係習大大接見，寄語香港社會各界齊心協力，喺中央政府大力支持同特首及特區政府帶領下，共創香港更加美好未來，時任特首梁振英當時未獲大孖沙支持，習大大似乎係有的放矢。唔知小熊維尼同粉紅豬友Piglet，呢次再並肩又會有乜新猷？