「早日發現、早去醫，檢查是關鍵……」繼「阿哥捐血，阿姐捐血」後，歷年唱紅咗唔少經典公益廣告歌嘅殿堂級歌星葉麗儀（圖），最近又推出新曲《檢查為乳健》，為香港乳癌基金會出心出力，唱好乳癌篩查。
呢首新曲嘅來頭一啲都唔小，由本港著名作曲家同音樂教育家陳永華教授作曲，由文化界德高望重嘅陳鈞潤負責填詞。首歌嘅旋律簡單，歌詞易明，令人容易琅琅上口，包括「早日發現、早去醫，檢查是關鍵」、「記住要定期驗、安心莫掛牽」。
乳癌基金會多年來倡議全民篩查，最近向特首林鄭月娥提交建議書，促當局分3個階段推行乳癌篩查。基金會創會人張淑儀醫生想將呢個重要訊息唱到街知巷聞，專誠搵以前嘅病人葉麗儀嚟幫手，透過歌曲將女性要定期做乳癌檢查嘅訊息推廣開去。關注健康嘅人士不妨去以下網址 https://www.youtube.com/watch?v=4GTVqkLyQHw&t=1s收聽。