除咗鄭小姐喺香港仔同野豬喜相逢之外，市民廖小姐星期日下晝3點幾，亦喺粉嶺和合石近浩園嘅墓地拜山時，見到兩隻一大一細嘅野豬嚟「拜山」。廖小姐話當時現場得佢同屋企人喺度，冇其他人拜山，佢帶咗隻雞同生果，都未將啲食物攞出嚟，點知兩隻野豬見到膠袋就離遠走埋嚟，相距只有3個墳頭位咋。
睇中祭祀食物
廖小姐話覺得好驚，一度叫屋企人：「你使唔使丟咗啲嘢食先，我驚佢哋（野豬）衝埋嚟！」不過之後兩隻野豬就行過咗，繼續四圍「搵山拜」。個幾鐘頭之後，廖小姐同家人拜完山，但兩隻野豬喺度仍然未走，似乎係吼住啲拜祭完嘅食物。
廖小姐話，當時兩隻野豬行得好近，最近只有一個墳頭位，大家喺度你眼望我眼。咁啱有多啲人上嚟拜山，佢哋見到野豬都嗌晒：「有野豬呀！」顯得好驚青咁。之後廖小姐就執埋啲嘢，早走早着，但兩隻野豬一度跟住佢落埋樓梯，然後先走咗去另一邊墳頭，真係嚇餐飽。