醫管局行政總裁梁栢賢（PY）今年初講明退休唔續約，最快出年7月就卸任。八方聽聞局方搵獵頭公司搞咗一輪「全球招聘」之後，都係由4位醫管局中人競逐呢個年薪隨時去到600萬嘅職位；最後由聯網服務總監高拔陞醫生跑出，極有機會兩年內連升兩級。不過呢單喜訊成唔成真呢﹖就要等娥特點頭先囉。
53歲嘅高醫生係老人科出身，10年前調任醫管局總辦事處做總行政經理，推動臨床服務規劃發展之餘，亦幫手處理唔少醫療事故。2012年回歸臨床管治，出任博愛醫院院長；之後仕途拾級而上，2013年升做新界西聯網行政總監，舊年4月再升做聯網服務總監，今年4月至就任，估唔到7個月後就有機會再升一級。
據聞高醫生揮低嘅3位對手，都係年資大過佢嘅「院長級」人馬，包括時任港島西總監陸志聰同埋新界東總監羅思偉。雖然醫管局內務會議上星期通過咗決定，但高醫生未慶祝得住，事關聽聞娥特仲未點頭。