球王基斯坦奴朗拿度（C朗）今季轉戰意甲，加盟班霸祖雲達斯，開咧三個月都唔夠，睇嚟佢已經征服咗亞平寧半島。上星期六聯賽，祖記作客安玻里意外先失波，但靠C朗射入12碼扳平，之後再入一球25碼遠射世界波，大顯神威，幫祖記以2:1反勝。祖記近14個意甲入球，其中10球C朗有份參與，佢喺賽後都話要睇番自己球世界波入得有幾靚。
九勝一和領導群雄
後防老將基亞連尼喺開波前突然覺得唔舒服，要臨時由魯加尼代替佢正選披甲。祖記喺28分鐘意外先失守，面對賽前已經連續八場聯賽不勝嘅安玻里，俾主隊前鋒卡佩圖喺禁區內窩利射入，半場領先1:0。祖記下半場反撲，比真歷喺早段射中楣，但到54分鐘終於扳平，保羅戴巴拿喺禁區內被踢跌，C朗操刀極刑追成1:1。
呢位葡萄牙球星一手帶領祖記由輸變贏，到70分鐘佢喺在禁區外右路，離門25碼位置起腳怒轟，個波直飛遠柱死角入網，幫祖記反勝2:1，踢完10輪聯賽之後以九勝一和不敗佳績，喺榜首遙遙領先。
漸入佳境梅開二度
祖記喺今季意甲已經入咗21球，當中最近七場共入14球，10球係C朗有份參與，貢獻咗七入球加三次助攻。睇番今季初C朗喺意甲開季連續三場都冇波入，外界即刻有抨擊聲音睇死佢，事實證明球王始終都係球王。
C朗賽後話：「我哋賽前已經知道呢場波唔易踢，尤其係之前經過一場歐聯大戰，唔少球員都覺得好攰，但我哋喺比賽一直堅持，到下半場製造到更多機會，可以反敗為勝絕對實至名歸。」講到奠勝一球世界波，C朗回應話：「其實我唔太記得呢個入球嘅具體過程，不過我會睇番比賽片段去回味吓。入嗰一球之前好快咁發生咗好多事，但我起腳施射嘅時候確係充滿自信，結果亦成功入波。」主帥艾基利亦大讚C朗：「佢呢一個入球，正正係一位超凡球員施展魔力，值得畀下一代去模仿。」