理大9月底以紅紙遮蓋民主牆上涉及港獨的言論，遭學生會炮轟打壓言論自由，引發學生絕食抗議，最終校方確認學生會擁有校內民主牆的「管治權」，學生先停止絕食。事發時一直拒絕會見學生的理大校長唐偉章，噚日出席佢任內最後一個理大畢業禮，台上致辭時更不忘「爆肚」搞gag。
唐偉章話自己將退休，所以基本上係同今年畢業生同屆「畢業」，問在場觀眾：「你們可以也給我一點掌聲嗎？」現場以博士學位為主嘅畢業生就好識做，同台上的嘉賓一齊拍手。
雖然之前拒絕會見理大絕食學生，但唐偉章噚日致辭時，就不斷為年輕人講好話，話自己總係聽到有人話呢一代年輕人比唔上前一代，但佢對此就未能苟同，又舉例反駁有人話𠵱家年輕人未能面對挑戰、過於自我中心以及創造力不足等問題。
唐偉章又話，若要佢只畀同學一個建議，佢就仍然會鼓勵同學要有夢想，並要努力活出並堅持自已夢想，「未來，就是在那些有夢想和努力實現夢想的人手中」。