噚日跑馬地馬場舉行今個馬季唯一嘅一次跑馬地日賽，恒生銀行前一姐梁高美懿三代同堂拉大隊入場，事關梁高丈夫梁承達醫生有份嘅名下馬「皇仁先鋒」，參加第八場三班1,000米賽事。「皇仁先鋒」嘅馬主皇仁賽馬團體係皇仁舊生會組成，結果隻馬喺本地騎師何澤堯策騎下一放到底。賽後喺凱旋門影拉頭馬相時，除咗一班昔日皇仁仔外，最搶鏡係梁高同埋媽媽以及佢兩個囡囡梁偉妍、梁偉端，搶走不少風頭。
「皇仁先鋒」能夠順利贏馬，賽前喺騎師配搭上其實經歷一波三折，據其中一位馬主皇仁仔區啟光講，原本由英國冠軍騎師蘇兆輝策騎，點知蘇兆輝臨嚟香港前喺英國犯規被罰停賽，之後決定交由香港冠軍騎師潘頓策騎，咁啱潘頓最近又被罰停賽，結果最終策騎權落喺何澤堯手上。