星期日嘅兩場澳職，有本田圭佑壓陣嘅墨爾本勝利，再次大熱倒灶，主場2:3俾珀斯光輝絕殺，兩場聯賽全敗排包尾。光輝雙箭頭祖爾捷安尼斯同安迪基奧治今場喺8分鐘同23分鐘，分別把握到勝利後防大意，喺門前輕易咁各入一球，幫光輝拎到個極佳開局。換邊後勝利靠安東尼斯喺47分鐘禁區頂遠射地波彈柱入網，同史唐路斯喺87分鐘接應角球近柱頂入追平。諗住有分落袋之際，勝利後防又出事，俾光輝打突擊下，雖然祖爾捷安尼斯嘅射門被救出，不過後上嘅伊高路美迪斯執雞嚟個絕殺，勝利就咁輸2:3，係澳職唯一零分嘅球隊，而光輝兩戰就有四分，表現唔錯。同日布里斯班獅吼主場同威靈頓鳳凰互交白卷，係今季澳職首場冇波入賽事。