近年本港發生過多宗墜𨋢事故，突如其來嘅急墜，嗰種離心力真係幾得人驚。噚日下晝兩點，馮先生同屋企人喺火炭山尾街沙田商業中心2樓一間酒樓飲完茶，搭𨋢落地下離開，點知落到地下見到一班消防員喺隔籬𨋢撬門救人，馮先生聽到有女乘客講，部𨋢突然間急墜，去到地下座低咗一至兩呎深，有三個人受傷。
扶手梯有上冇落
根據馮先生所拍嘅片段見到，消防員救出嘅其中兩名女乘客懷疑chok親條腰，坐咗喺客戶服務中心等救護車，其中一個女乘客就話，佢喺2樓搭𨋢落地下，部𨋢去到1樓「突然間嘭一聲、好大力咁跌落去……好彩係2樓咋，如果唔係我唔敢想像！」馮先生話出事嗰部𨋢應該係2號𨋢，之後見到2號𨋢同4號𨋢都圍封咗，電梯維修公司嘅職員亦都收到通知到場了解。
救護車將兩個女乘客同埋另一個伯伯送院檢查，伯伯要用擔架床送院，送院期間清醒。現場總共有6部升降機，另有扶手電梯同樓梯，地下至2樓係購物商場，3樓係停車場，樓上係寫字樓。噚日係星期日，唔少人去商場食嘢行街，馮先生每逢星期六、日都會去嗰度飲茶，佢話最近商場嘅扶手電梯向下行嘅一邊封晒做緊檢查維修，扶手電梯有上冇落。所以顧客落樓多數都搭𨋢。
馮先生仲話，間中都有見到商場嘅𨋢或者扶手電梯封閉維修，但搭𨋢嗰陣就唔覺有乜唔妥，或者有乜怪聲傳出，相信管理公司都有定期檢查電梯。小記聯絡過沙田商業中心想了解件事，聽電話嘅職員承認升降機有事故，但就話冇負責人喺度，佢自己好忙，解答唔到問題。機電署話初步調查相信係訊號系統問題，令升降機機箱去到地面之後仍未停低，直至機箱觸動下限位安全掣嗰陣，俾安全系統制停。署方確認升降機所有懸吊纜索狀況良好，話並冇急墜。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。