曼聯前鋒盧卡古因為經常失機，成日俾球迷同名宿批評。最近連「瀟灑哥」貝碧托夫（小圖）亦出聲，指盧卡古經常失機嘅原因，係因為成日將事情簡單複雜化。貝碧認為盧卡古急於表現自己，係導致失機頻頻嘅主因：「佢想令人知道自己好畀心機，所以從來唔做簡單嘅事，例如帶個波入禁區。佢成日都將事情簡單複雜化。」
貝碧又用自身經歷勉勵盧卡古，佢話：「我記得當年喺曼聯亦經歷過一段好唔順嘅日子，足足有成七至八場冇波入，但之後竟然一場入五球喎。呢啲事每個人都會遇到，我知佢已經連續八場冇入波，但外界對佢嘅批評係唔公道嘅。正如摩連奴所講，盧卡古一直為團隊努力付出，雖然對前鋒嚟講，咁或者唔係件好事。」