彭浩翔、鄒凱光（灘叔）和劉翁三人首度合作的棟篤笑《翔揸劉灘之潮潮的吹》，前晚在演藝學院首場演出，獲謝安琪、陳靜和林海峰等撐場。彭浩翔等三人齊齊現身舞台揭開序幕，台下有觀眾大叫：「回水」，他們即時說：「黃子華話回水，講咗咁多年都冇，我哋一開騷就回水！」結果有工作人員拿了三支水槍給他們向觀眾席射水。
爆粗鬧英女皇
彭浩翔開騷期間，在台上問現場觀眾有否試過「衰過11」？彭浩翔說：「知唔知『衰11』係指邊啲字？係過度迷戀前殖民年代生活，簡單講即係戀殖。」他表示自己的父母是前港英政府的爪牙出身，爸爸是警察、媽媽在社會福利署做社工，有一次在公廁的廁格內，見到有人寫「英女皇正臭X」，照讀完給媽媽聽之後被摑了一巴。
話雖如此，彭浩翔又大爆前港英政府貪污腐敗，他說：「嗰陣有政策如果氣溫喺12度以下，會派毛氈畀露宿者，嗰啲毛氈係用政府嘅錢買，每張係400蚊，即係英國佬用香港人嘅錢，去買英國毛氈再送畀香港露宿者，我唔知條數係點計，亦都唔識計。」之後，他又拿此事來諷刺時弊，他說：「若果𠵱家啲人派毛氈，夠唔夠膽攞？會用幾多錢去賣？拎咗毛氈返嚟，又會唔會夠膽冚？驚唔驚敏感？去到今日，我夠膽講一句，我係反殖民，喺港英政府嘅時候，我已經夠膽講嗰六個字，𠵱家建制派又夠唔夠膽講？佢哋都唔敢，因為佢哋啲仔女都仲喺外國讀書，所以我夠膽同講我已經唔係戀殖。」
網騙係辛苦錢
對於近期有不少網上情緣騙案，灘叔亦有提及：「好佩服佢哋，搵嘅係辛苦錢，因為要𠱁女人開心係一件唔容易嘅事，但係我最不值係啲人形容佢哋係網上騙徒，其實女人都會上網買衫，𠵱家只不過係上網買人𠱁佢哋開心，呢個絕對係網購，呃乜嘢箒？」
採訪：馬建華
攝影：仇志德
