阿仙奴禮拜四晚喺歐霸盃，憑韋碧克一箭定江山，作客以1:0小勝士砵亭，亦將球隊嘅連勝走勢加到11場。今場兩隊都唔係好多機會，上半場最有威脅嘅一次攻門嚟自主隊，士砵亭隊長拿尼喺32分鐘離門25碼起腳，可惜越楣而過。換邊後，槍手喺66分鐘先食詐糊，韋碧克雖然頭槌頂入，但球證話佢推人在先，入球被判無效。結果全場唯一入球喺完場前13分鐘出現，韋碧克把握士砵亭中堅高亞迪斯跣腳失位，推波入禁區右腳射入，幫球隊作客1:0小勝一場。賽後錄得11連勝嘅阿仙奴，只要贏多三場就可以追平隊史紀錄嘅14連勝，佢哋下場將會作客水晶宮。
至於另一支倫敦強隊，車路士憑住小將「龍虎切」羅夫度斯卓克連中三元，主場以3:1擊敗白俄羅斯球隊巴迪。
「龍虎切」戴帽
車仔今場開波分幾鐘就有進賬，龍虎切禁區內接應傳中射入，過咗六分鐘後，佢再接應角球近門射成2:0。下半場車路士繼續強攻，踢到53分鐘，羅夫度斯卓克喺禁區頂躺射，個波直飛遠柱入網，亦係佢今場攻入嘅第三球。雖然客隊79分鐘破蛋，車路士仍然以3:1大勝巴迪。今場大演帽子戲法嘅龍虎切，亦係繼熱刺前鋒哈利卡尼之後，四年嚟第一位英格蘭球員喺歐霸盃「戴帽」。
