內地股市自美國開展貿易戰之後，跌到四腳朝天，特朗普曾發出一個「推特」，聲稱「美國市道大好，中國市場崩潰」，都係嘲諷中國股市難以撐得住貿易戰也，喺十月二日之後，內地股滬綜指更加大幅度下跌，最低跌破二千五百點，見2449點，比52周高位3587點，唔見咗32%，投資者傷到盡。咁鬼冇面，於是中央財金巨頭由副總理劉鶴領導大合唱，人民銀行行長、中證監、中保監，齊齊一致唱好，出完口術，就調動保險公司資金支援質押股票及銀行券商暫停斬倉，於是以洪荒之力，十月二十二日逼高A股4%，港股亦順勢上揚599點，一掃前兩個星期嘅頹風。
不過證諸過往經驗，中央全力托市救市不只一兩次，次次都係連威幾日，一到國家隊靜靜雞退市之後，股市又試慢性腹瀉，2015年嗰場救市就係如此收場，救市也者，就是動用國庫資金為大戶提供逃生門，有公帑托住，散戶唔散水就係笨仔。信國家隊，信有形之手，信國家力量頂住股市者，十年來輸死未天光，醒目仔女兼有料春江鴨，一早知道救市時間表嘅，就當然識得上車落車啦，唔係點解上海和北京不時有大款揸住二十萬人民幣到酒家宴客，二十萬只係用嚟派貼士嘅啫。
呢個時候股市跌跌吓忽然大升，十月二十三日大升，跟住十月二十四日又大跌806點，早一日跟風入貨者，立即輸凸。我地呢類散戶隨時左一巴，右一巴，畀大市打到肉痛。有心做長期投資者嘅，都係不變應萬變，不動如山，等收股息好過，好似沙田陳太咁，揸住一啲REIT，不聞不問，定期收息有錢買餸，唔理得單位價上上落落。散戶揸滙豐亦是如此，125蚊唔賣，依家點會係聞回購而喜吖，滙豐唔搞無謂嘢，將回購嗰幾十億美元用嚟派息，長期散戶先至會講句多謝。不少專家指利率上升之時，揸REIT有風險，單位價會跌喎，其實跌咪跌囉，最緊要派息唔好跌，派息減少，單位價就一定散晒。好似昨日講到有人敵意收購春泉地產信託（Spring REIT 1426），呢隻REIT每單位派息0.236元，息率超過6%，有兩件優質物業在北京中心商業區，長揸幾好，如果想賺股價嘅，邊度會買REIT咁儍仔呀，梗係一早去炒燃氣股、科技股、藥物股啦，買REIT之最大目的就係收息，單位價上升故然好，下跌亦唔出貨㗎嘞，年年有六厘息，點解要賣番出去啫？敵意收購相等於平價私有化，收購成功之人笑得最後，最大聲，以低於每股資產淨值股價嚟收購，如果畀人私有化成功，搵自己笨咩！