周三歐聯分組賽第三輪，近仗入球唔多嘅利物浦終於發火，喺呢場C組賽事主場4:0大破貝爾格萊德紅星登上榜首，難得嘅係紅軍最強三叉戟：「埃及文明」穆罕默德沙拿、沙迪奧文尼同羅拔圖法明奴喺今季終於首次同場齊齊入波。不過沙拿今場就算梅開二度都好似唔多開心，好在之後收到大媽送嘅禮物笑番。
紅軍喺上輪分組賽作客不敵拿玻里，連同該仗經歷一段四戰不勝走勢，直到上周六先重返勝軌，喺英超作客哈特斯菲爾德小勝1:0。雖然贏番波，但近五場加埋只入三球啞晒火。周三歐聯，利物浦開賽20分鐘由法明奴先開紀錄，到完半場前沙拿再擴大比數。易邊後只係六分鐘，沙拿主射12碼梅開二度，呢球亦令佢成為紅隊史最快入50球嘅球員，喺上季加盟後，只係用咗65場就到達呢個里程碑，打破40年代紅軍名將史度賓斯保持嘅77場紀錄。
賽後收禮沙拿笑番
「埃及明」都入波，文尼亦要湊吓熱鬧，佢喺76分鐘本來已經有機會，但主射另一球12碼宴客，好在到80分鐘接應史杜列治傳送門前篤入，三大射手終於齊齊入波，亦助利物浦大勝紅星4:0。同組另一場，巴黎聖日耳門主場迎戰拿玻里，主隊兩度落後下最後靠迪馬利亞補時建功，以2:2逼和對手。兩隊和波失分益咗利物浦，後者三戰得六分暫時升上榜首。
沙拿破紀錄，但似乎仍然唔係咁開心，見佢入波後一直木無表情冇乜慶祝，好在賽後佢睇到一個喺場邊嘅阿拉伯女球迷高舉阿拉伯文紙牌，上前收咗呢位大媽禮物後，再露出笑容仲同晏菲路球迷揮手拜拜。沙拿梅開二度後，今季各項賽事累積只入六球，入球率同上季仍然有距離；不過紅軍領隊高路普，賽後就話已經厭倦再答有關沙拿入球嘅問題。
