上季日職亞軍鹿島鹿角，喺亞冠盃四強首回合領先韓職嘅水原藍翼3:2，周三次回合，作客嘅鹿島半場領先1:0，點知換邊後15分鐘內被藍翼連入三球，一下子由領先變落後。不過波係圓嘅，鹿角之後由西大伍同沙真奴（左）入波，追成3:3，結果兩回合計贏6:5首次躋身亞冠盃決賽，將會同伊朗球隊柏斯波利斯爭冠，兩回合嘅決賽會喺11月頭上演，鹿角先主後客。