下個禮拜先到萬聖節，但《蘋果》同事就提早過節！噚日下晝，海洋公園副主席「筍盤」劉鳴煒帶隊嚇入《蘋果》大樓，殊不知《蘋果》同事夾計，將驚喜回贈劉鳴煒。
反被整蠱 驚到出汗
話說噚日劉鳴煒一身怪醫打扮、抱住「活生生」嘅病人阿Fred（玩偶），帶埋一王一后嘩鬼，鬼鬼祟祟走入《蘋果》大樓。唔少同事俾佢嚇一跳，然後得啖笑。當劉鳴煒以為自己驚嚇力十足，同事阿T早就諗定，等劉嚇佢時偷偷踢甩電腦電線，扮到趕緊份稿都冇埋。劉鳴煒當堂嚇親，「我哋玩㗎咋」，尷尬非常兼一額汗。
劉鳴煒之後話：「阿Fred幫佢唔到，阿Fred唔識打字」，同阿T講「唔好意思」。正當佢尷尬到目瞪口呆，我哋先揭曉整蠱一事，佢搖搖頭笑住講：「出汗啦真係」，話之後再同人「打招呼」都要小心翼翼。「筍盤」今次嚟《蘋果》，淨係化妝都用咗半粒鐘，希望嚇到人尖叫。佢又話無論男女老幼去海洋公園玩都係求開心，園方一向重視遊客安全，特別指今年做足內部檢討、有專家研究過，叫大家放心去被嚇。
