艾馬利果然有料到！阿仙奴喺周一英超主場鬥李斯特城，憑後備上陣嘅奧巴美揚三分鐘內連入兩球，反勝對手3:1，11年嚟再喺各項賽事錄得雙位數嘅10連勝，可喜可賀，相信亦令曼城、利物浦同車路士三支名次排喺佢哋前面嘅球隊，唔敢睇低槍手嘅爭標機會。
艾馬利睇齊雲格
李斯特城今場踢到31分鐘，藉芝維爾嘅傳波省中比利連先開紀錄，但擺烏龍嘅比利連，完半場前將功補過送上助攻，交畀今場做隊長嘅奧斯爾射成1:1。換邊後，阿仙奴攻勢越嚟越入肉，去到63分鐘，入替只係兩分鐘嘅奧巴美揚，就再接應比利連傳送建功，三分鐘後，兵工廠19秒內經過九腳無間斷傳送後，由奧斯爾美妙助攻奧巴美揚梅開二度，最終以3:1反勝拎走三分，聯賽榜繼續守住梗頸四位置，各項賽事就10連勝，只計英超都連贏七場，狀態一流。
取代奇哥德兵入波最多
球會對上一次取得雙位數連勝，已經要數到07年10月嘅12連勝，當時仲係由雲格教緊，但艾馬利嚟到只係五個月就已經造出呢個成績，唔怪得外界都話呢位前PSG領隊俾人低估咗。阿仙奴家陣只係落後榜首雙雄曼城同利記兩分，仲已經追上車仔，同得21分，勝率仲要高過對方。
場波另一焦點就落喺中場奧斯爾身上。經歷之前嘅退出國家隊風波，佢好似比以前仲有鬥志，今場交出一傳一射，令佢英超入球總數達到30球，超越埋熱刺名宿奇連士文 （29球），成為英超入波最多嘅德國球員。
輸波嘅李城就爆出搞笑一幕，前鋒占美華迪踢到87分鐘時，突然向領隊佩爾示意要離場，而且匆匆走入更衣室後就冇再返嚟。網民笑話佢似係要去大解，所以先咁急走人，佩爾賽後亦好妙咁話：「佢當時有啲唔舒服，所以要行開一陣，但家陣佢望落去已經冇嘢囉！」