左丁山轉行做傳媒之後，先知道世界上有一個CPJ（保護記者委員會Committee to Protect Journalists，總部設在紐約），委員會成立目的係救援世界各地受政治或暴力迫害嘅記者，每個會員獲發一張會員證，當會員遇上人為危難，可以按咭上通訊方法求救。用意當然係好，但CPJ唔係警察，最多只能代受威脅記者報警或通告天下，希望透明度能夠發生阻嚇作用。
可惜呢，殺人犯及主腦人邊度會怕CPJ吖，在威權社會、獨裁政權及黑幫毒梟眼中，殺一個記者視作等閒，殺兩位當一雙，幾十年來不知有多少記者被謀殺，皆與佢地報導政治醜聞，官商受賄行賄，黑幫運毒，權貴以財謀私等新聞有關，或寫評論批判統治者。呢啲事情在俄羅斯、烏克蘭、墨西哥及中東發生過唔知幾多次，最近一位30歲保加利亞女記者被先姦後殺，更令人震驚。
但勢估唔到，一名沙特阿拉伯記者神秘死亡，懷疑被沙特阿拉伯皇室派人殺死、分屍，竟然成為世界大事，影響國際關係及可能推高石油價格！當歐美各國為「記者之死」沸騰，傳媒大肆報導之時，最「冷靜」之大國不發一言，視作無睹，站在「不干涉別國內政」擋箭牌後面嘅，自不然是俄羅斯與中國。
沙特阿拉伯記者（Jamal Khashoggi）卡素治係沙特阿拉伯名記者，從報導蘇聯出兵阿富汗（1979年12月），拉登興亡史以至阿拉伯政治，都有涉及，以前不時為沙特阿拉伯高官做顧問，但後來因為國內評論得罪權貴及國王，成為政黨不歡迎人物，受到冷待，去年自我放逐到美國，兼職為華盛頓郵報時事評論員，一個月寫一篇，其中有批評王儲Bin Salman，更為沙特政府所忌。今年9月28日，佢到土耳其伊斯坦堡沙特阿拉伯領事館申請離婚證明書。領事叫佢10月2日到取，於是卡素治如時應約，當地時間10月2日下午1時14分入到領事館，之後就未見過出番嚟，不知去向。而根據土耳其政府紀錄，當日凌晨3時28分，沙特人員坐私人飛機到達伊斯坦堡，入住領事館附近酒店，中午12時13分有幾架外交人員汽車進入領事館，15時08分離開；17時15分，第二架沙特私人飛機到達，兩架飛機分別於18時20分及21時離開伊斯坦堡，整件事十分懸疑神秘，似間諜電影情節。最新消息係沙特人員拷問卡素治出手太重，將佢殺死，屍體不知去向。事隔十八日沙特公佈記者之死係因為領事館內打架，意外死亡。全世界都不信啦，現在要看王儲是否會引火焚身了。