習總今年主打「掃黑除惡」，作為政協副主席嘅梁振英亦唔執輸，除咗四出發律師信「提醒」傳媒同埋學者免墮「誹謗梁振英」嘅陷阱外；仲大灑金錢將對方告上法庭，兼請律師費不菲嘅資深大狀鮑永年代表佢。鮑係行內出名嘅誹謗案專家，立法會議員謝偉俊、財爺陳茂波都請過佢打誹謗案。
辯方申請押後交抗辯書
事緣《立場新聞》兩個月前刊登咗一篇提及689出席「小桃園飯局」、「與會中有人有江湖背景」嘅報道，689即刻嬲豬入稟狀告文章作者、理大助理教授鍾劍華同埋《立場》，辯方原本今個月16號要呈交抗辯書，交代吓認唔認罪咁。但689份狀書洋洋灑灑寫滿28版；本來告人哋兩篇文章誹謗，𠵱家告7篇，仲要上個月先交到鍾劍華同《立場》手上，搞到人哋應接不暇，噚日向法庭申請多啲時間寫抗辯。
689一方就話其實冇乜文件要睇，反對押後；但講到明押後都得，要求聆案官頒個有條件命令，如果兩人唔準時交抗辯書就要被判敗訴。聆案官就話文件有一定嘅複雜性，批准押後21日先交抗辯書，又提醒鍾劍華同埋《立場》再申請押後嘅話，法庭可能就會頒佈有條件命令㗎喇。
李八方