意甲周日上演米蘭打吡，國際米蘭憑莫路伊卡迪喺補時頭槌建功，以1:0絕殺AC米蘭，各項賽事已取得七連勝。莫路伊卡迪今場開賽11分鐘已經破網，但旁證舉旗示意越位，球證喺視像裁判協助下確認佢越位在先，入球無效，AC米蘭其後亦有梅沙基奧因越位在先而「食詐糊」。換邊後兩隊都難以製造機會，以為互無紀錄完場，國米卻喺補時打破僵局，由伊卡迪接應馬泰斯雲仙奴傳送後藉AC門將基安盧基當會隆馬出迎失誤頂入，以1:0險勝AC米蘭。國米贏出呢場打吡後，以九戰得19分排聯賽榜第三位，落後榜首嘅祖雲達斯六分同次席嘅拿玻里兩分，少賽一場嘅AC米蘭則以12分排喺第12位。