打官司用英文好平常，但講到打麻雀，相信律師都係講返中文。
高等法院噚日續審深水埗無屍兇殺案，辯方用英文盤問途中，就用中文講出一堆打麻雀術語：碰、上、明暗槓、一炮三響……繙譯員女士估佢唔到，笑住話盡力試譯，立即運用「國粹」底子，將碰同上譯成「組合三隻相同的牌」同「三隻連續數字或圖案的牌」。法官李瀚良話好彩陪審團都係華人，不過身為全場唯一洋人嘅主控官，就話要請副手幫忙理解嘞。
被告顏永周嘅鄰居楊雪媚作供，話成日約人打牌，被告經介紹成為麻雀腳。辯方問楊係咪搞非法麻雀檔，定咗好多規則，俾警方施壓，先至喺認人手續話認出被告。楊唔同意，澄清打牌規矩唔係佢話事，例如三個人開唔到枱，唔係佢決定。庭上眾人包括法官同繙譯員，聽到呢吓都忍唔住笑。