距離立法會九龍西補選仲有一個月鬆啲，幾個候選人都各自各出招谷票，民主派代表李卓人噚日傍晚同被DQ嘅劉小麗，喺補選簡介會前示威，抗議當局無理DQ，貫徹「問是非分真假」嘅理念；曾被指借「健康大使」之名偷步宣傳嘅建制派代表陳凱欣，就做戲做全套，話落區發現一班公公婆婆冇牙而食唔安笑唔出，承諾要為長者爭取牙科福利。
馮檢基搵明哥合照
相隔8年再戰九西嘅馮檢基，噚日就去咗深水埗明哥嘅舖頭度打卡，同明哥合照，又留低「社區服務社區改革」八個大字，不過就冇講點樣服務，點樣改革。佢仲會喺fb報道街站情況，日前就同有份參與上次補選、喺論壇痛哭嘅蔡東洲一齊派傳單，基哥嘅助選團義工果然五湖四海乜人都有。
不過幾位都唔夠自稱「劏房阿哥」嘅伍廸希「瞓身」，佢喺fb發起「Falling Candidate Challenge」，喺立立亂嘅劏房中趴地影相，literally瞓身㗎，呼籲關注劏房問題，仲tag晒幾個候選人挑機。之不過選民應該關心候選人政綱多啲，八方就認為今日開始嘅連串選舉論壇先見真章喇。九西補選候選人仲有曾麗文。