駛出真功夫，方為大師傅！司機揸車見到快相機，梗係要減速啦，但若然快相機進入連拍功能，都唔知硬食定係停車好。最近有一段短片熱傳，片中顯示一部喺元朗公路嘅快相機「short」咗，短短22秒內連閃40次，嚇到各位司機大佬唔知點算。
嗰段由私家車女乘客用手機拍攝嘅WhatsApp短片顯示，部快相機裝喺元朗公路去屯門方向近唐人新村對開，車速限制為每小時80公里，但唔知具體拍攝日子同時間，只知係夜晚影嘅，片中見到快相機不斷狂閃，次數非常頻密，唔同一般偵測超速車輛後連閃兩下。
片中明顯見到車流不多，但快相機超速又影，唔超速照影，一於有殺錯冇放過，強光程度猶如行雷閃電，途經司機見狀明顯減速，但仍然逃唔過「被強拍」下場，不過車上男女一於少理，男司機忍不住狂笑：「搞乜嘢呀？」女乘客亦半開玩笑稱：「咁恐怖㗎！」
警認壞機 收告票可要求覆檢
短片喺群組瘋傳後，引起司機憂心忡忡，其中一個司機話，擔心中招後懵然不知，收告票又要解釋同證實快相機出問題。《蘋果》記者噚日揸去現場睇吓，以合法車速兩度駛過快相機，但都冇見到佢狂閃。我哋再問警方，發言人承認噚日朝進行例行檢查，發現嗰部快相機發生故障，已聯絡承辦商跟進。
警方又話會對嗰部快相機影到嘅相進行覆檢，任何接獲超速違例定額罰款通知書嘅人，如需要提出申訴，亦可以向中央交通違例檢控組提出覆檢要求。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。