維港泳噚日朝早舉行，一如以往都有唔少政界飛魚落場參加，包括再度參賽嘅勞工及福利局局長羅致光同環境局政治助理區詠芷，以及第三度參賽、事先仲剪咗個髮迎戰嘅會計界議員梁繼昌。唔講唔知，原來愛好游泳嘅梁繼昌一直都想組織政界名人隊出戰維港泳，最終搵咗區詠芷「搭路」搵到「處女下海」嘅商務及經濟發展局政治助理馮海容入隊，四人為備戰更曾齊齊練水。
網民讚身材super fit
神童局長游完全程後話呀，今年較去年大浪，水流都急，但都以直線游到終點，覺得表現與上屆相若。特首林鄭月娥噚日做維港泳主禮嘉賓，神童局長又係佢多年老友兼愛將，自然有同佢打氣兼合照，娥特事後仲係fb貼佢同神童局長及參賽嘅環保署同事合照。
梁繼昌就話聞到船隻汽油味，但港內水質唔錯，覺得賽事秩序比去年暢順，唯一挑剔係要等兩、三分鐘至搵到位上岸。民建聯鄭泳舜亦「處男下海」，佢玩開三項鐵人，相信維港泳都難唔到佢。
而喺馮海容fb所見，佢爹哋即係曾任醫管局新界東醫院聯網總監嘅馮康都有參加維港泳，有網民睇到馮海容嘅泳衣照就留言「Wow」，大讚佢嘅身材super fit。