中國高官近年相繼「被自殺」，估唔到香港官場則興起惹火言論「被消失」。話說特首林鄭月娥前日出席前財爺梁錦松搞嘅教育研討會，致辭時有兩大重點，包括當年大學收生若要求申請人有全人發展，識得體育藝術，怕且佢作為高材生咁叻考試，都難以入到港大；其次係佢話佢同劉德華近日都遭受網絡欺凌。
傳媒其後當然大篇幅報道呢兩點，但係平日負責公佈主要官員演辭嘅新聞處網頁，竟然冇將林鄭呢兩個臨場爆肚嘅重點加入演辭。
前日照讀演辭嘅林鄭，突然爆肚講咗呢段話：「（若）要求每一個中學畢業生，除咗有好嘅DSE嘅成績，都要有體、有藝，有各方面嘅經驗，我哋亦都要問對於基層嘅學生，是否公道？……如果當年我入大學時都要學生有全人發展要識體同埋藝，要做portfolio，恐怕我呢位咁擅長考試嘅高材生，都難以入到當時呢一間最高嘅學府。」
特首辦︰只記錄主要內容
唔知係咪不滿因填海議題被出氣，之後林鄭又不滿有人喺網上攻擊佢，「如最近我本人同埋劉德華先生，就因為同一個議題，成為咗網絡欺凌嘅目標」。結果林鄭呢兩點，成為當日傳媒報道焦點，但八方睇返，卻見新聞處未有將如此精警說話以白紙黑字紀錄。
點解會咁㗎？特首辦回覆話，特首嘅致辭文本一般記錄佢喺有關活動嘅主要致辭內容，供大眾同新聞界參閱。唔通被消失嗰兩點爆肚內容，唔算主要內容？但引起好多迴響喎……
惹火演辭刪走
「如果當年我入大學時都要學生有全人發展要識體同埋藝，要做portfolio，恐怕我呢位咁擅長考試嘅高材生，都難以入到當時呢一間最高嘅學府。」
「最近我本人同埋劉德華先生，就因為同一個議題，成為咗網絡欺凌嘅目標。」
李八方