有人話私家車係鐵包人，電單車係人包鐵，如果唔留神，揸電單車好易發生意外。有讀者提供上星期五晚上一宗電單車自炒車禍嘅車cam片段。時間大約發生喺嗰晚8點幾，當時鐵騎士載住個女性友人，沿北角渣華道慢線去鰂魚涌方向，佢橫過一個十字路口時，就喺近渣華道街巿對開畀架由中線切線到慢線嘅私家車嚇親，下意識扭左閃避，結果當場失衡炒埋壆邊。
片段所見，電單車閃避嗰刻已經左搖右擺，失控炒壆之後，鐵騎士同女友人好似空手道撻生魚咁成個人翻滾落地，幸好嗰陣時車速唔快，加上有頭盔保護，兩人事後識得自行起返身，跑緊步嘅男途人都有上前慰問佢哋，而肇禍嘅私家車男司機前駛大約20米後停車，返回原位察看鐵騎士傷勢。我哋問返警方，翻查紀錄有冇相關案件，相信好大機會係兩名司機自行解決問題，但係事件提醒一眾鐵騎士，馬路如虎口，稍有分心都好易領嘢。