好哋哋出街食晚餐，點解要搞到大打出手呢？前晚7點幾，兩個大男人喺馬鞍山耀安邨一間粥麵快餐店裏面，懷疑因為搭枱問題相嗌唔好口，有人突然情緒激動，除埋件衫露出背脊嘅紋身圖案，仲郁手打人。結果警員到場拉咗一個打人嘅男人，而被打嗰位食客就額頭受傷流晒血，由白車送院。
目擊者黃小姐當時喺粥麵店裏面，佢睇唔過眼有人郁手打人，於是就拍低咗相同片，向《蘋果》爆相爆片。從片段可以見到，當時有個惡男鬧到火紅火綠，粗口橫飛，佢仲除埋件衫赤膊上身，露出背脊大幅紋身圖案，其間突然衝前出手打向另一名食客。被打傷嗰位食客硬食一嘢，即場呼救：「有冇人同我報警呀？」
惡男嘅一個女親友，即時將佢拉開，但惡男打完人之後仲振振有詞咁話：「我媽咪係你鬧㗎咩？可以亂咁鬧人嘅咩？」有女街坊見咁樣都上前勸交：「阿哥，出嚟食飯箒，唔好咁！」但係惡男以為郁手打人好啱，繼續話對方：「唔好手指指嘛！」
被打男爆缸 警持盾牌戒備
黃小姐話成件事好似係因為搭枱問題而起，打人嗰個話對方鬧佢阿媽，又手指指向佢媽咪。事發期間食店其他食客爭相走避，有細路女見到咁嘅場面仲嚇到爆喊，要媽咪帶佢走。事件中傷者被打到成面血，要由救護車送院。警方到場嘅時候，有警員仲一度手持盾牌戒備。
警方話事件中兩名食客因瑣碎事爭執，66歲姓唐男人額頭受傷送院，而警員就拉咗個30歲姓陳嘅男人，佢涉嫌襲擊他人致造成身體傷害，亦都報稱隻手受傷要送院。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。