今時今日做議員，都要識得同網民互動呃like，八方最近統計68名立會議員嘅facebook專頁like數，發現頭三個最多人like嘅專頁全屬民主派，依次係民主黨鄺俊宇、公民黨楊岳橋同議會陣線朱凱廸，共通點係三個都係票王。
梁君彥冇開page
第四名終於輪到建制派兼女將，就係新民黨葉劉淑儀。葉劉嘅白滑玉腿咁吸睛，可能都係呃like撒手鐧。
原來現時68個議員中，49個有經營fb專頁，只有10個未有，全部都係建制派功能組別議員，包括立法會主席梁君彥、地產及建造界經民聯石禮謙，以及做咗兩屆都冇乜人識嘅勞工界潘兆平等。而有開fb專頁嘅議員，like數真係差天共地，首位嘅鄺俊宇就有超過21萬like，新任財會副主席、金融界陳振英則以202個like包尾，但點都好過唔開fb嘅議員嘅。