現年26歲、14年宣佈出櫃嘅王曼喜（Kayla）噚日喺西九文化區藝術公園為「一點粉紅2018」活動擔任嘉賓主持，除咗獲父母王敏德、馬詩慧同弟妹全家總動員到場支持外，仲有去年喺同一個活動認識成為新戀人嘅partner，順便慶祝埋相識紀念日。而同場仲有活動大使鄭欣宜、李蕙敏同黃耀明等嘉賓主持開幕儀式，而參加《全民造星》比賽嘅楊樂文、江熚生，仲有李拾壹、釗鋒同王若琪等歌手擔任表演嘉賓。
相識紀念日
首次做司儀心情好緊張嘅Kayla，自爆情人有到場支持，不過就冇刻意現身，Kayla話：「我partner都有嚟，但未咁快公開住，家人同佢好熟，冇刻意公開佢，順其自然。我係舊年呢個活動識佢，今日算係我哋相識紀念日。」Kayla仲話同情人未去到談婚論嫁階段，但將來結婚都想可以喺香港舉行，因為香港係自己屋企，亦好想喺香港爭取到平權。
支持活動多年嘅明哥喺台上話，因為要籌備台灣演唱會，所以今年唔做表演嘉賓，但反而有機會喺現場玩吓，真正感受氣氛。而連續四年支持活動嘅欣宜就特意將自己嘅歌重新編寫成medley獻唱：「呢個活動對我好重要，我仲排咗舞，等氣氛好啲。」佢仲帶埋愛犬支持活動，但驚被搶鏡，所以唔會同狗狗一齊上台表演。
撰文：馮仁昭
