相對利物浦贏得驚險，同樣上周六出場的盟主曼城就瀟灑得多，由射手阿古路等五將各建一功下，主場5:0大炒般尼，令倒戈的赫特不斷失守；阿古路亦以六球升上射手榜次席，力追七球的夏薩特。
曼城今仗有中場重心奇雲迪布尼養傷兩個多月後復出先任後備，不過其他球員亦相當醒神，17分鐘一次短傳配合，大衛施華禁區左路傳入小禁區，阿古路輕鬆左腳掃入，半場領先1:0；換邊後，貝拿度施華、費蘭甸奴、馬列斯及利萊辛尼各入一球，當中馬列斯禁區頂妙射死角建功一球最刁鑽，就此令首次倒戈「藍月」的赫特五度失守，曼城目前亦以23分及得失球領先利記排榜首。
熱刺僅勝韋斯咸
同日英超，熱刺由拉美拿一箭定江山，作客1:0小勝韋斯咸，以21分追至與車路士同分，暫因得失球差不及車仔排第四。至於升班馬卡迪夫城終取得今季首勝，主場4:2力挫另一升班馬富咸，後者小將賴恩施斯隆，就成為英超首位2000年或以後出生的「士哥手」。另紐卡素主場0:1不敵白禮頓，九戰只得兩分跌落榜尾。
文：飛鴻