國際賽周前四場不勝嘅皇家馬德里，上周六喺西甲早場繼續爆冷輸波，主場鬥利雲特竟然輸1:2，各項賽事三連敗，仲要創下隊史116年嚟嘅最長入球荒紀錄，去到481分鐘先靠左閘嘅馬些路入到波。
皇馬呢場波其實唔多強陣，雖然有艾斯高復出，但加里夫巴利、賓施馬同卻奧斯都做後備，結果佢哋開賽13分鐘內已經失兩球，而且兩球都係中堅華拉尼做罪人，先係六分鐘攔唔到對方高波長傳，被敵軍嘅荷西摩拉利斯輕鬆挑過門將泰拔高圖爾斯，射入空門，之後呢位法國冠軍隊員又喺13分鐘禁區內犯手球，球證經過VAR輔助下判罰12碼，利雲特由羅渣馬迪操刀射入，爆大冷領先兩球。
皇馬教練盧比迪古，好快咁喺下半場早段已經用晒三個換人名額，巴利、賓施馬同丹尼施巴路斯紛紛入替，但皇馬都要踢到72分鐘先由馬些路，接應賓施馬傳球追番一球，但皇馬仍然超越咗1985年嘅464分鐘最長入球荒紀錄，經歷481分鐘先再有入波出現，而且最後都返魂乏術，無法改寫三連敗嘅糟糕戰績。